వైట్ హౌస్ లోకి మోడీకి స్వయంగా స్వాగతం పలికిన బైడెన్ దంపతులు
19 తుపాకులతో మోడీకి గౌరవ వందనం
మోడీ-బైడెన్ సంయుక్త మీడియా సమావేశం
వాషింగ్టన్ : ప్రధాని నరేంద్ర మోడీ అమెరికా పర్యటన కొనసాగుతోంది. తాజాగా ఆయనకు
అమెరికా అధ్యక్ష భవనం వైట్ హౌస్ లో ఘన స్వాగతం లభించింది. మోడీ ని అమెరికా
అధ్యక్షుడు జో బైడెన్ దంపతులు స్వయంగా స్వాగతించారు. 19 తుపాకులతో సాయుధ
సైనికులు మోడీకి గౌరవ వందనం సమర్పించారు.
మోడీ, బైడెన్ కాసేపట్లో ఇరు దేశాల సంబంధాలపై సంయుక్త ప్రకటన చేయనున్నారు.
రక్షణ రంగం, నూతన సాంకేతికతలు, ఆరోగ్య రంగం, పర్యావరణం, వీసాలు, అత్యవసర సేవల
రంగాలు తదితర అంశాల్లో పరస్పర సహకారంపై ఒప్పందాలను కూడా ఈ సమావేశంలో
వెల్లడించనున్నారు. మోడీ వైట్ హౌస్ లో అడుగుపెట్టిన సందర్భంగా అమెరికా
అధ్యక్షుడు జో బైడెన్ స్పందిస్తూ అమెరికా, భారత్ మధ్య బంధం 21వ శతాబ్దంలో
కెల్లా అత్యంత అర్థవంతమైనదని అభివర్ణించారు. ఇరు దేశాల రాజ్యాంగాల్లోని మొదటి
మాడు మాటలు ‘వుయ్ ద పీపుల్’ అనే ఉంటాయని, రెండు సార్వభౌమ దేశాలను కలిపి ఉంచే
అంశం ఇదేనని పేర్కొన్నారు. కాగా ద్వైపాక్షిక సమావేశం ముగిసిన అనంతరం మోడీ,
బైడెన్ సంయుక్తంగా మీడియా సమావేశంలో పాల్గొననున్నారు.
