* అమలాపురంలో ఆసక్తికరంగా ఫ్లెక్సీలు
ఏపీలో బీఆర్ఎస్ పార్టీ కి ఫాలోయింగ్ పెరుగుతోందా? వచ్చే ఎన్నికల్లో పోటీ
చేసేందుకు కొందరిలో ఆసక్తి మొదలైందా అంటే..అవుననే సమాధానం వినిపిస్తోంది.
ఏకంగా బీఆర్ఎస్ అభ్యర్థి అంటూ ఫ్లెక్సీలు కలకలంరేపాయి. అంబేద్కర్ కోనసీమ
జిల్లా అమలాపురం లో బీఆర్ఎస్ పార్టీ ఫ్లెక్సీలు వెలశాయి. రేవు అమ్మాజీ పేరుతో
పట్టణంలో ఫ్లెక్సీలు ఏర్పాటు చేశారు. బీఆర్ఎస్ పార్టీ అమలాపురం ఎంపీ అభ్యర్థి
తానే అంటూ ఫ్లెక్సీలో రేవు అమ్మాజీ ప్రకటించేసుకున్నారు. పార్టీ పేరు
ప్రకటించిన రెండు రోజుల్లోనే ఇలా ఫ్లెక్సీలు చూసి స్థానికులు అవాక్కయ్యారు.
ఏకంగా ఎంపీ అభ్యర్థిని తానేని ప్రకటించుకోవడం ఆసక్తికరంగా మారింది.
విజయవాడలో టీఆర్ఎస్, బీఆర్ఎస్ హోర్డింగ్లు ఏర్పాటు కావడంపై స్థానికంగా చర్చ
జరిగింది. విజయవాడ మాత్రమే కాదు దేశంలోని వివిధ రాష్ట్రాల్లో భారీ
హోర్డింగ్లు, పోస్టర్లు కనిపించాయి. దేశ్ కీ నేత కేసీఆర్ అంటూ ఢిల్లీ సహా పలు
రాష్ట్రాల్లో కేసీఆర్ పోస్టర్లు, బ్యానర్లు ఏర్పాటు చేశారు. అంతేకాదు కేసీఆర్
ఏపీ పర్యటనకు వెళ్లిన సమయంలో, ఆయన పుట్టిన రోజు సందర్భంగా కొంతమంది అభిమానులు
ఫ్లెక్సీలు, హోర్డింగ్లు ఏర్పాటు చేసిన సందర్భాలు గతంలో జరిగాయి. విజయవాడతో
పాటూ మరికొన్ని నగరాలు, ప్రాంతాల్లో ఫ్లెక్సీలు ప్రత్యక్షమయ్యాయి. ఇప్పుడు
మళ్లీ బీఆర్ఎస్ పార్టీకి అనుకూలంగా ఫ్లెక్సీలు ఏర్పాటు చేయడం హాట్ టాపిక్
అవుతోంది. దసరా రోజు తెలంగాణ ముఖ్యమంత్రి కేసీఆర్ భారత్ రాష్ట్ర సమితి
పార్టీని ప్రకటించిన సంగతి తెలిసిందే.
