తానా రైతు సదస్సు.. విశిష్ఠ అతిథులు వీళ్లే

ఫిలడెల్ఫియా : తానా 23వ మహాసభల్లో భాగంగా ‘తానా రైతు సదస్సు’ కార్యక్రమాన్ని
ఏర్పాటు చేయనున్నారు. ఈ కార్యక్రమానికి తెలుగు రాష్ట్రాల నుంచి ఏడుగురిని
విశిష్ఠ అతిథులుగా ఆహ్వానించారు. ఉత్తర అమెరికా తెలుగు సంఘం (తానా) 23వ
మహాసభలను ఫిలడెల్ఫియాలోని పెన్సిల్వేనియా కన్వెన్షన్‌ సెంటర్‌లో జూలై 7,8,9
తేదీల్లో వైభవంగా నిర్వహించనున్నారు. ఈ మహాసభల సందర్భంగా వివిధ కార్యక్రమాలు
ఏర్పాటు చేస్తున్నారు. ఇందులో భాగంగా జులై 9న ఆదివారం ఉదయం 10గంటల నుంచి
12.30గంటల మధ్య ‘తానా రైతు సదస్సు’ నిర్వహిస్తున్నారు. ఈ కార్యక్రమానికి ఎంపీ
రఘురామ కృష్ణంరాజు, టీపీసీసీ అధ్యక్షుడు రేవంత్‌ రెడ్డి, తెలంగాణ
పంచాయతీరాజ్‌శాఖ మంత్రి ఎర్రబెల్లి దయాకర్‌ రావు, తెదేపా ఎంపీ కనకమేడల రవీంద్ర
కుమార్‌, విజయ డెయిరీ కార్పొరేషన్‌కు చెందిన డా.చలసాని ఆంజనేయులు, సాగునీటి
వినియోగదారుల సంఘాల సమాఖ్య అధ్యక్షుడు డా. ఆళ్ళ వెంకట గోపాలకృష్ణారావు,
సినీనటుడు నాగినీడు వెల్లంకి విశిష్ఠ అతిథులుగా హాజరవుతున్నట్టు తానా
వెల్లడించింది. ఈ కార్యక్రమానికి సంబంధించిన మరిన్ని వివరాలను
tanaconference.org చూడొచ్చు.