హైదరాబాద్ : తెలంగాణ హైకోర్టుకు ముగ్గురు న్యాయమూర్తులను నియమించాలని
సుప్రీంకోర్టు కొలీజియం కేంద్ర ప్రభుత్వానికి సిఫార్సు చేసింది. ఇందులో
అడ్వొకేట్‌ కోటా నుంచి లక్ష్మీనారాయణ అలిశెట్టి, అనిల్‌ కుమార్‌ జూకంటి,
న్యాయాధికారుల కోటా నుంచి సుజన కలసికం ఉన్నారు. ఈ నెల 12న సుప్రీంకోర్టు
ప్రధాన న్యాయమూర్తి జస్టిస్‌ డీవై చంద్రచూడ్‌ నేతృత్వంలో సమావేశమైన జస్టిస్‌
సంజయ్‌కిషన్‌కౌల్‌, జస్టిస్‌ సంజీవ్‌ఖన్నాలతో కూడిన కొలీజియం ఈ మేరకు నిర్ణయం
తీసుకుంది. కొలీజియం ఒక ప్రకటన విడుదల చేసింది. ‘‘తెలంగాణ హైకోర్టు ప్రధాన
న్యాయమూర్తి అక్కడి ఇద్దరు సీనియర్‌ న్యాయమూర్తులతో సంప్రదించిన అనంతరం
న్యాయవాదుల కోటా నుంచి ఎంపిక చేసిన ఇద్దరి పేర్లను 2022 డిసెంబరు 22న
ప్రతిపాదించారు. న్యాయాధికారి కోటాలో ఎంపిక చేసిన పేరును అదే ఏడాది అక్టోబరు
23న సిఫార్సు చేశారు. ఈ పేర్లకు రాష్ట్ర గవర్నర్‌, ముఖ్యమంత్రి కూడా ఆమోదముద్ర
వేశారు. న్యాయవాద వృత్తిలో లక్ష్మీనారాయణకు 26 ఏళ్లు, అనిల్‌కుమార్‌కు 20 ఏళ్ల
అనుభవం ఉంది. లక్ష్మీనారాయణకు ఆర్బిట్రేషన్‌లో, రిట్‌, సివిల్‌, కమర్షియల్‌
లిటిగేషన్‌ కేసుల్లో నైపుణ్యం ఉంది. అనిల్‌కుమార్‌కు ట్యాక్సేషన్‌లో
ప్రావీణ్యం ఉంది. ఆయన సివిల్‌, క్రిమినల్‌, సర్వీస్‌ లా, కాన్‌స్టిట్యూషనల్‌
కేసులు వాదించారు.
న్యాయాధికారి సుజన పేరును పరిశీలించేటప్పుడు కొందరు సీనియర్‌ న్యాయాధికారుల
పేర్లను హైకోర్టు సిఫార్సు చేయలేదన్న విషయాన్నీ పరిగణనలోకి తీసుకున్నాం.
ఆమెకంటే సీనియర్ల పేర్లను ఎందుకు సిఫార్సు చేయలేదో చెబుతూ హైకోర్టు కొలీజియం
చెప్పిన కారణాలను పరిశీలించి, వాటితో ఏకీభవించాం. సుప్రీంకోర్టులో తెలంగాణ
అంశాలపై అవగాహన ఉన్న సహచర న్యాయమూర్తులు, కేంద్ర న్యాయశాఖ అభిప్రాయాలను
క్రోడీకరించాక న్యాయవాదులు లక్ష్మీనారాయణ అలిశెట్టి, అనిల్‌కుమార్‌ జూకంటి,
న్యాయాధికారి సుజన కలసికం హైకోర్టు న్యాయమూర్తులుగా నియమించడానికి తగినవారన్న
నిర్ణయానికి వచ్చి, వారి పేర్లను సిఫార్సు చేయాలని నిర్ణయించాం’’ అని కొలీజియం
వివరించింది. మొత్తంగా 49 మంది న్యాయమూర్తులు ఉండాల్సిన తెలంగాణ హైకోర్టులో
ప్రస్తుతం 25 మంది పని చేస్తున్నారు. వారిలో మహిళా న్యాయమూర్తుల సంఖ్య
ఎనిమిది. కొత్త వారి నియామకానికి కేంద్రం ఆమోదిస్తే మొత్తం న్యాయమూర్తుల సంఖ్య
28కి, మహిళా న్యాయమూర్తుల సంఖ్య 9కి చేరుతుంది.
సుజన కలసికం : యాదాద్రి భువనగిరి జిల్లా ఆలేరుకు చెందిన మధుసూదన్‌, ప్రమీల
దంపతులకు 1970 మార్చి 10న సుజన కలసికం జన్మించారు. 1997లో బార్‌ కౌన్సిల్‌లో
నమోదయ్యారు. 2010లో జూనియర్‌ సివిల్‌ జడ్జిగా ఎంపికయ్యారు. జూనియర్‌ సివిల్‌
జడ్జిగా కొనసాగుతూనే 2012లో జిల్లా జడ్జి పరీక్షలు రాశారు. కరీంనగర్‌ అదనపు
జిల్లా జడ్జిగా, నిజామాబాద్‌ జిల్లా జడ్జిగా, హైదరాబాద్ సిటీ సివిల్‌
కోర్టులో స్మాల్‌ కాజెస్‌ కోర్టు చీఫ్‌ జడ్జిగా, జ్యుడిషియల్‌ అకాడమీ
డైరెక్టర్‌గా పనిచేశారు. ఏడాది కాలంగా హైకోర్టు రిజిస్ట్రార్‌ జనరల్‌గా విధులు
నిర్వహిస్తున్నారు.
లక్ష్మీనారాయణ అలిశెట్టి : నిజామాబాద్‌ జిల్లా బాల్కొండ మండలం మెండోరాలో
ప్రధానోపాధ్యాయుడు గంగాధర్‌, రాజుబాయి దంపతులకు 1968 మే 13న లక్ష్మీనారాయణ
అలిశెట్టి జన్మించారు. నిజామాబాద్‌లో డిగ్రీ పూర్తి చేసి, కాకతీయ యూనివర్సిటీ
నుంచి న్యాయశాస్త్రంలో పట్టా పొందారు. 1994లో బార్‌కౌన్సిల్‌లోనమోదయ్యారు.
రాజ్యాంగం, సివిల్‌ లాలో నైపుణ్యం సాధించారు. జాతీయ రహదారుల అభివృద్ధి
అథారిటీ, ఎన్‌బీసీసీ, వివిధ బ్యాంకులకు స్టాండింగ్‌ కౌన్సిల్‌గా ఉన్నారు.
