రైలు పట్టాలపై రక్తపాతం… తెరపైకి కవచ్ టెక్నాలజీ!

భారతదేశ రైల్వే చరిత్రలో అతిపెద్ద విషాదంగా చెబుతున్న ఘోర రైలు ప్రమదం తాజాగా
ఒడిశాలో జరిగింది. వందల సంఖ్యలో ప్రయాణికులు మృత్యువాత పడగా మరికొన్ని వందల
మంది క్షతగాత్రులయ్యారు. అసలు ఈ ప్రమాధం ఎలా జరిగింది.. కారణాలు ఏమిటి..
సాంకేతిక లోపం శాతం ఎంత.. ప్రత్యక్ష సాక్షుల కథనం ఏమిటి.. అధికారులు
చెబుతున్నదేమిటి అనేది ఇప్పుడు చూద్దాం!

జూన్ 2వ తేదీ శుక్రవారం సాయంత్రం బెంగళూరు నుంచి పశ్చిమ బెంగాల్ లోని హావ్
డాకు వెళ్తున్న బెంగళూరు-హావ్ డా సూపర్ ఫాస్ట్ ఎక్స్ ప్రెస్ బాలేశ్వర్
సమీపంలోని బహానగా బజార్ వద్ద పట్టాలు తప్పడంతో దాని బోగీలు పక్కనే ఉన్న ట్రాక్
పై పడిపోయాయి. సాయంత్రం సరిగ్గా 6 గంటల 55 నిమిషాల 28 సెకన్లకు గంటకు 128
కిలోమీటర్ల వేగంతో షాలిమార్ – చెన్నై సెంట్రల్ కోరమండల్ ఎక్స్ ప్రెస్ ఆ
బోగీలను ఢీకొట్టింది. సాధారణంగా గంటకు దాదాపు 130 కి.మీ. వేగంతో వెళ్లే రైలు
వేగం సున్నాకు చేరుకునేందుకు అకస్మాత్తుగా బ్రేక్ వేస్తే 60 నుంచి 80 సెకన్లకు
పైగా సమయం పడుతుందట. కానీ ప్రమాదం జరిగి 23 సెకన్లలోనే వేగం జీరో కు
చేరుకుందంటే పట్టాలపై ఉన్న బోగీలను కోరమండల్ ట్రైన్ ఎంత బలంగా ఢీకొట్టిందో
అర్థం చేసుకోవచ్చు.

ప్రత్యక్ష సాక్షుల కథనం : అయితే ఇక్కడ గమనించాల్సిన విషయం ఏమిటంటే ఈ ప్రమాధంపై
ప్రత్యక్ష సాక్షుల కథనం ఒకలా ఉంటే… అధికారుల కథనం మరోలా ఉంది. ప్రత్యక్ష
సాక్షుల కథనం ప్రకారం… బెంగళూరు నుంచి పశ్చిమ బెంగాల్లోని హావ్డాకు
వెళ్తున్న బెంగళూరు-హావ్డా సూపర్ఫాస్ట్ ఎక్స్ప్రెస్ తొలుత పట్టాలు తప్పింది.
ఫలితంగా దాని పలు బోగీలు పక్కనే ఉన్న ట్రాక్పై పడిపోయాయి. వాటిని
షాలిమార్-చెన్నై సెంట్రల్ కోరమండల్ ఎక్స్ప్రెస్ ఢీకొట్టింది. అనంతరం ఈ బోగీలను
గూడ్సు రైలు ఢీకొంది అని!

అధికారుల వెర్షన్ : అయితే అధికారుల వెర్షన్ మరోలా ఉంది! సాయంత్రం 6.55 గంటల
సమయంలో బహనాగ రైల్వేస్టేషన్ వద్ద స్టాప్ లేకపోవడంతో వేగంగా వెళ్తున్న కోరమండల్
ఎక్స్ ప్రెస్ బోగీలు ఒక్కసారిగా పట్టాలు తప్పాయి. ఫలితంగా పక్కన ఉన్న ట్రాక్
పైకి కోరమండల్ కోచ్ లు పడిపోయాయి. అదే సమయంలో పడిపోయిన కోచ్ లని ఆ ట్రాక్ పై
వస్తున్న యశ్వంత్ పూర్-హౌరా ఎక్స్ ప్రెస్ ఢీకొట్టడంతో ఆ ట్రైన్ కు సంబంధించిన
నాలుగు బోగీలు పట్టాలు తప్పాయని చెబుతున్నారు అధికారులు.
అసలు ఏమి జరిగింది?: అయితే అసలు ఏమి జరిగిందనే విషయాలు మరో రకంగా ఉండటం ఇక్కడ
గమనించాల్సిన విషయం. వేగంగా వెళ్తున్న కోరమండల్ ఎక్స్ ప్రెస్ పట్టాలు
తప్పిందని అధికారులు చెబుతున్నారు. కానీ స్టేషన్ వద్ద.. మధ్యలో ఉన్న లూప్ లైన్
లో గూడ్స్ రైలు ఆగి ఉంది. స్టేషన్ లో స్టాప్ లేనప్పుడు రైలుకు మెయిన్ లైన్ లో
ట్రాక్ సిగ్నల్ ఇవ్వాల్సి ఉంటుంది. అయితే కోరమాండల్ కు లూప్ లైన్ లో సిగ్నల్
ఇచ్చారన్న ఆరోపణలు వినిపిస్తున్నాయి. ఈ వాదనను బలపరుస్తూ… ఓ ఫోటో వెలుగులోకి
వచ్చింది. ఆ ఫోటోలో వేగంగా ఢీకొట్టడంతో… ఎక్స్ ప్రెస్ రైల్ ఇంజిన్ గూడ్స్
ర్యాంప్ ఎక్కేసింది.

కవచ్ టెక్నాలజీ : దీంతో ప్రమాద తీవ్రత ఏ స్థాయిలో ఉందనేది అర్ధం చేసుకోవచ్చు.
ఈ సమయంలో “కవచ్ టెక్నాలజీ” ని తెరపైకి తెస్తున్నారు పరిశీలకులు. భారతీయ రైల్వే
ప్రమాద నిరోధక వ్యవస్థే ఈ “కవచ్”! దీని ద్వారా రెండు రైళ్లు ఒకే ట్రాక్ లో
వస్తూ ఉంటే అవి ఆటోమేటిక్ గా ఆగిపోయేలా ఈ టెక్నాలజీ పనిచేస్తుంది. దీంతోపాటు ఈ
టెక్నాలజీ రైళ్లను వెనక్కి కూడా నడిపిస్తుంది. అందువల్ల ఏ రెండు రైళ్లు
ఢీకొనవు. అయితే ఈ వ్యవస్థ ఇక్కడ అమలులో ఉందా లేదా అనేది ఆసక్తిగా మారింది.

రైలు రక్షణ హెచ్చరిక వ్యవస్థ : ఇదే సమయంలో రైల్వే మంత్రిత్వ శాఖ ప్రకారం
ప్రమాదాలను ఆపడానికి “రైలు రక్షణ హెచ్చరిక వ్యవస్థ” ఒక ముఖ్యమైన విభాగం.
ఇందులో రైల్వే ఇంజిన్ లోని క్యాబ్ లో సెట్ చేసిన స్క్రీన్ పై ప్రతి సిగ్నలూ
కనిపిస్తుంది. రైలు ఎంత వేగంగా వెళ్తుందనే విషయం లోకో పైలట్లు నిరంతరం
స్క్రీన్ పై చూస్తారు. ఇది కూడా రైలు ప్రమాదాలు జరగకుండా కొంతవరకూ ఆపుతుంది.
సమస్యాత్మక పరిస్థితుల్లో ఈ వ్యవస్థ రైలు నెమ్మదిగా వెళ్లేలా చేస్తుంది కూడా.
అయితే ఈ ప్రమాధంపై పూర్తి విచారణ జరిపితేనే కానీ అసలు సమస్య తెరపైకి
రాదన్నమాట. కారణం ఇంత టెక్నాలజీ అభివృద్ధి చెందిన రోజుల్లో కూడా భారత రైల్వే
వ్యవస్థలో కమ్యునికేషన్ సిస్టంలో ఇన్ని లోపాలు ఉన్నాయా అనేది తాజాగా తెరపైకి
వస్తున్న విషయం.

సహాయక చర్యలు : ఇక బాధితులను రక్షించేందుకు అధికారులు సహాయక చర్యలను ముమ్మరం
చేశారు. క్షతగాత్రులను ఆస్పత్రులకు తరలించేందుకు పెద్ద సంఖ్యలో అంబులెన్స్ లను
పంపారు. దాదాపు 60 అంబులెన్సులను ఘటనా స్థలానికి తరలించినట్లు తెలుస్తోంది.
సహాయక చర్యలను మరింత ముమ్మరం చేసేందుకు మూడు ఎన్.డి.ఆర్.ఎఫ్. బృందాలు నాలుగు
రాష్ట్ర సహాయక బృందాలు రంగంలోకి దించారు. అలాగే బాలేశ్వర్ లోని వైద్య కళాశాలలు
ఆస్పత్రులను అధికారులు అప్రమత్తం చేశారు.