ఐసిఐసిఐ మోసం కేసులో ప్రధాన నిందితుడు, ముంబైకి చెందిన వీడియోకాన్ గ్రూప్ ఛైర్మన్ వేణుగోపాల్ ధూత్‌ను సెంట్రల్ బ్యూరో ఆఫ్ ఇన్వెస్టిగేషన్ (సిబిఐ) సోమవారం అరెస్టు చేసింది. ఇప్పటికే, ఐసిఐసిఐ బ్యాంక్ మాజీ సిఇఒ చందా కొచ్చర్, ఆమె భర్త దీపక్ కొచ్చర్ ఈ కేసులో అరెస్టయ్యారు. ముంబైలోని ప్రత్యేక సీబీఐ కోర్టులో వీడియోకాన్ గ్రూప్ ఛైర్మన్‌ను సీబీఐ హాజరుపరిచింది. రుణ మోసం కేసులో వాస్తవాలను వెలికితీసేందుకు దర్యాప్తు ఏజెన్సీ అతని కస్టోడియల్ రిమాండ్‌ను కోరింది.
ఐసిఐసిఐ బ్యాంక్ లిమిటెడ్, ట్రెండ్ ఎలక్ట్రానిక్స్ లిమిటెడ్, సెంచురీ అప్లయన్సెస్ లిమిటెడ్, కైల్ లిమిటెడ్, వాల్యూ ఇండస్ట్రీస్ లిమిటెడ్, ఇవాన్ ఫ్రేజర్ & కో ఇండియా లిమిటెడ్, వేణుగోపాల్ ధూత్ ప్రమోట్ చేసిన వీడియోకాన్ గ్రూప్‌కు చెందిన అన్ని కంపెనీలకు దాదాపు రూ. 3,250 కోట్ల క్రెడిట్ సౌకర్యాలను ఐసిఐసిఐ బ్యాంక్ మంజూరు చేసింది. బ్యాంకింగ్ నియంత్రణ చట్టం, ఆర్‌బిఐ మార్గదర్శకాలు, బ్యాంకు క్రెడిట్ పాలసీని ఉల్లంఘిస్తూ ఐసిఐసిఐ బ్యాంక్ ఉన్నతాధికారులు ఈ కంపెనీలకు రుణ సదుపాయాలను మంజూరు చేసినట్లు నివేదిక వెల్లడించింది.
సుప్రీమ్ ఎనర్జీ ప్రైవేట్ లిమిటెడ్(SEPL) ద్వారా ధూత్ నూపవర్ రెన్యూవబుల్స్ లిమిటెడ్ (ఎన్‌ఆర్‌ఎల్)లో రూ.64 కోట్ల పెట్టుబడులు పెట్టినట్లు ఆరోపణలు వచ్చాయి. SEPLను దీపక్ కొచ్చర్ నిర్వహించే పినాకిల్ ఎనర్జీ ట్రస్ట్‌కు సర్క్యూట్ మార్గం ద్వారా బదిలీ చేసింది. ఇది 2010-12 మధ్య జరిగింది. ఈ క్రమంలో సీబీఐ బృందం ఇప్పటికే ఐసీఐసీఐ బ్యాంక్ మాజీ సీఈఓ చందా కొచ్చర్‌తో పాటు ఆమె భర్త దీపక్ కొచ్చర్‌ను శనివారం అరెస్టు చేసింది.
