శ్రీవారిని దర్శించుకున్న సుప్రీం కోర్ట్ న్యాయమూర్తి జస్టిస్ భూషణ్ రామకృష్ణ గవాయ్

తిరుమల : తిరుమల శ్రీవారిని సుప్రీం కోర్టు న్యాయమూర్తి జస్టిస్ భూషణ్
రామకృష్ణ గవాయ్ ఆదివారం కుటుంబ సభ్యులతో కలిసి దర్శించుకున్నారు. ఆయనకు టీటీడీ
చైర్మన్ భూమన కరుణాకరరెడ్డి, ఈవో ఏవి ధర్మారెడ్డి స్వాగతం పలికారు. దర్శనం
అనంతరం జస్టిస్ భూషణ్ రామకృష్ణ గవాయ్ కు రంగనాయకుల మండపంలో వేద పండితులు
వేదాశీర్వచనం చేశారు. తరువాత చైర్మన్‌ ఆయనకు తీర్థప్రసాదాలు, శ్రీవారి ఫొటో,
నమామి గోవిందం కిట్‌, అగర్‌బత్తీలు, డ్రై ఫ్లవర్‌ టెక్నాలజీతో తయారు చేసిన
స్వామివారి ఫొటోను అందజేశారు. ఈ సందర్భంగా ఏపీ హైకోర్టు సీజే జస్టిస్ ధీరజ్
సింగ్ ఠాకూర్ కూడా స్వామివారిని దర్శించుకున్నారు. అనంతరం సుప్రీంకోర్టు
న్యాయమూర్తి, ఏపీ హైకోర్టు సీజే ఇద్దరూ కలిసి శ్రీ బేడీ ఆంజనేయ స్వామివారి
ఆలయంలో పూజలు చేశారు.

తిరుచానూరు : సుప్రీంకోర్టు న్యాయమూర్తి జస్టిస్ భూషణ్ రామకృష్ణ గవాయ్
తిరుచానూరు శ్రీ పద్మావతి అమ్మవారిని దర్శనం చేసుకున్నారు. వీరికి టీటీడీ ఈవో
ఏవి ధర్మారెడ్డి స్వాగతం పలికి దర్శన ఏర్పాట్లు చేశారు. అనంతరం అమ్మవారి
దర్శనానికి విచ్చేసిన ఎపి హైకోర్టు సీజే జస్టిస్ ధీరజ్ సింగ్ ఠాకూర్ కు
అర్చకులు ఆలయ మర్యాదలతో స్వాగతం పలికారు. అమ్మవారి దర్శనం తరువాత టీటీడీ ఈఓ,
ఆలయ అధికారులు ఆశీర్వాద మండపంలో వీరికి తీర్థ ప్రసాదాలు అందజేశారు.