సీఏఎఫ్ కీలక ప్రకటన.. – కెనడాలోని భారతీయులకు ప్రయోజనం

కెనడియన్ సాయుధ దళాలు(CAF).. తాజాగా కీలక ప్రకటన విడుదల చేసింది. కెనడాలోని
విదేశీ పౌరులకు మిలటరీలో చేరే అవకాశం కల్పించింది. శాశ్వత నివాస హోదా కలిగిన
విదేశీ పౌరులు.. కెనడీయన్ ఆర్మ్ డ్ ఫోర్స్ (CAF)లో చేరవచ్చని ప్రకటనలో
తెలిపింది. ఈ క్రమంలో అక్కడ నివసిస్తున్న భారతీయులకు లబ్ధి చేకూరే అవకాశం
ఉంది. కెనడాలోని ప్రభుత్వ, ప్రైవేటు సంస్థలను మానవ వనరుల కొరత తీవ్రంగా
వేధిస్తోంది. ఈ క్రమంలోనే కెనడా ప్రభుత్వం తమ దేశంలోకి భారీ స్థాయిలో వలసలను
ప్రోత్సహిస్తోంది. గత ఏడాది కెనడా చరిత్రలోనే అత్యధికంగా నాలుగు లక్షల మందికి
శాశ్వత నివాస హోదా కల్పించింది. ఈ నేపథ్యంలో దాదాపు లక్ష మంది భారతీయులు
కెనడాలో శాశ్వత నివాస హోదా లభించింది. అంతేకాకుండా 2022-24 మధ్య సుమారు
10లక్షల కంటే ఎక్కువ మంది విదేశీ పౌరులకు శాశ్వత నివాస హోదా కల్పించాలని
భావిస్తోంది. ఈ క్రమంలోనే శాశ్వత నివాస హోదా కలిగిన విదేశీయులకు మిలటరీలో చేరే
అవకాశాన్ని కెనడియన్ ఆర్మ్ డ్ ఫోర్స్ కల్పించింది. CAF నిర్ణయంతో ఇప్పటికే
కెనడాలో స్థిరపడ్డ (శాశ్వత నివాస హోదా పొందిన) భారతీయులకు లబ్ధి చేకూరనుంది.