హైదరాబాద్ : కేంద్ర, రాష్ట్ర వ్యవసాయ శాఖల సంయుక్త ఆధ్వర్యంలో గురువారం నుంచి
మూడు రోజులపాటు జరిగే జీ20 దేశాల వ్యవసాయ మంత్రుల సదస్సుకు హైదరాబాద్
ఆతిథ్యమివ్వనుంది. హెచ్‌ఐసీసీలలో ప్రారంభమయ్యే సదస్సు 17 వరకు కొనసాగనుంది.
సభ్య దేశాల మధ్య వ్యవసాయ రంగంలో సహకారాన్ని పెంపొందించడమే లక్ష్యంగా సాగే ఈ
సదస్సులో జీ20 సభ్యదేశాలైన ఇండోనేసియా, బ్రెజిల్‌, అర్జెంటీనా, ఆస్ట్రేలియా,
కెనడా, చైనా, యూరోపియన్‌ యూనియన్‌, ఫ్రాన్స్‌, జర్మనీ, ఇటలీ, జపాన్‌, కొరియా,
మెక్సికో, రష్యా, సౌదీ అరేబియా, దక్షిణాఫ్రికా, తుర్కియే తదితర ఆహ్వానిత
దేశాలు, అంతర్జాతీయ సంస్థల నుంచి 200 మందికి పైగా ప్రతినిధులు
పాల్గొననున్నారు. తొలిరోజు కేంద్ర వ్యవసాయశాఖ సహాయ మంత్రి కైలాస్‌ చౌధురి
వ్యవసాయం, దాని అనుబంధ రంగాల్లో భారత్‌ సాధించిన విజయాల ఎగ్జిబిషన్‌ను
ప్రారంభిస్తారు. అనంతరం వ్యవసాయ వాణిజ్యం ప్రాధాన్యం, లాభార్జన, డిజిటల్‌
సాంకేతికతల వినియోగం తదితర అంశాలపై చర్చిస్తారు. రెండోరోజు ఆహార భద్రత,
పౌష్టికాహారం కోసం సుస్థిర వ్యవసాయం, వ్యవసాయంలో మహిళల పాత్ర, జీవవైవిధ్యం,
వాతావరణ సమస్యల పరిష్కారాలపై కేంద్ర వ్యవసాయశాఖ మంత్రి నరేంద్ర సింగ్‌ తోమర్‌
ఆధ్వర్యంలో ఉన్నత స్థాయి చర్చలు జరుగుతాయి. మూడో రోజు కేంద్ర వ్యవసాయ మంత్రి
అధ్యక్షతన వ్యవసాయ కార్యాచరణ బృందం జీ20 సదస్సుల నిర్వహణ ఫలితాలపై చర్చించి
ఆమోదం తెలియజేస్తారు. సదస్సు ముగిసిన తర్వాత ప్రతినిధులంతా హైదరాబాద్‌లోని
జాతీయ చిరుధాన్యాల పరిశోధన సంస్థను సందర్శిస్తారు.
