దుర్గమ్మకు శ్రీశైలం శ్రీ భ్రమరాంభికా మల్లిఖార్జున స్వామి దేవస్థానం నుండి పవిత్ర సారె సమర్పణ

విజయవాడ : ఆషాడ మాసం సందర్బంగా ఇంద్రకీలాద్రి శ్రీ దుర్గామల్లేశ్వర
స్వామివార్ల దేవస్థానంలో దుర్గమ్మకు శ్రీశైలం శ్రీ భ్రమరాంభికా మల్లిఖార్జున
స్వామి వారి దేవస్థానం నుండి పవిత్ర సారె సమర్పించారు. ఆలయ చైర్మన్ రెడ్డివారి
చక్రపాణి రెడ్డి దంపతులు, ఆలయ కార్యనిర్వాహణాధికారి ఎస్ లవన్న దంపతులు,
ట్రస్ట్ బోర్డు సభ్యులు అమ్మవారికి ఆషాడ సారె సమర్పించుటకు విచ్చేయగా వీరికి
ఆలయ కార్యనిర్వహణాధికారి దర్భముళ్ల భ్రమరాంబ ఆలయ మర్యాదలతో స్వాగతం పలికారు.
అనంతరం వీరు అమ్మవారిని దర్శనం చేసుకొని అమ్మవారికి సారె సమర్పించారు. వీరికి
ఆలయ వేదపండితులు వేదాశీర్వచనం చేయగా కార్యనిర్వహణాధికారి అమ్మవారి ప్రసాదములు,
శేషవస్త్రము, చిత్రపటం అందించారు. శ్రీశైలం దేవస్థానం వారు శ్రీ
దుర్గమల్లేశ్వర స్వామివార్ల దేవస్థానం కార్యనిర్వాహనాధికారి కి శ్రీశైలం
దేవస్థానం శేషవస్త్రం, ప్రసాదములు చిత్రపటము అందజేశారు. అనంతరం మహామండపం 6వ
అంతస్తు నందు దేవస్థానం వారు ఏర్పాటు చేసిన అమ్మవారి ఉత్సవ విగ్రహం వద్ద ఆలయ
అర్చకులు పూజలు నిర్వహించి, అందరికీ ఆశీర్వాదం అందించారు. ఈ కార్యక్రమంలో ఆలయ
ఉప కార్యనిర్వాహనాధికారి పి గురుప్రసాద్, స్థానాచార్యులు విష్ణుభట్ల శివప్రసాద
శర్మ, ట్రస్ట్ బోర్డు సభ్యులు బుద్దా రాంబాబు, కట్టా సత్తయ్య, సహాయ
కార్యనిర్వాహనాధికారి పి. చంద్రశేఖర్, శ్రీశైలం దేవస్థానం అర్చకులు,
అధికారులు, సిబ్బంది, తదితరులు పాల్గొన్నారు.