ముఖంపై ముడతలు రావడానికి కారణాలు ఏమిటంటే..?

ముఖంపై ముడతలు ఎక్కువగా ఉంటే చిన్న వయసులోనే ముసలివారిలా కనిపిస్తారు.
దీనికోసం చర్మ సౌందర్యంపై దృష్టి పెట్టడం చాలా ముఖ్యం. అయితే కొన్ని అలవాట్లు
కూడా ముఖంపై ముడతలకు కారణమవుతాయి. వాటికి దూరంగా ఉంటే ఎల్లపుడూ యవ్వనంగా
కనిపించవచ్చు.

* చక్కెర వాడకం:

అతిగా చక్కెర వాడకం వల్ల తొందరగా ముడతలు వస్తాయి. చక్కెర మన శరీరంలో గ్లైకేషన్
కు గురవుతుంది. ఇది చక్కెర, ప్రోటీన్ల మధ్య జరిగే ఓ రసాయన చర్య.ఇది ప్రోటీన్
పనితీరును ప్రభావితం చేస్తుంది. చర్మం స్థితిస్థాపకతను బలహీనపర్చి ముడతలకు
కారణమవుతుంది.

* ఒత్తిడి:

ఎక్కువ ఒత్తిడికి గురయ్యేవారిలో తొందరగా వృద్ధాప్య లక్షణాలు కనిపిస్తాయి. అధిక
ఒత్తిడి సమయంలో అడ్రినల్ గ్రంథుల ద్వారా విడుదలయ్యే హార్మోన్లు ముఖంపై ముడతలకు
కారణమవుతాయి.

* నిద్రలేమి:

ప్రస్తుతం చాలామంది పిల్లలు, యువత మొబైల్స్ వల్ల నిద్రలేమికి గురవుతున్నారు.
దీనివల్ల టీనేజ్ సమయంలోనే వృద్ధాప్య ఛాయలు వస్తున్నాయి. తక్కువ నిద్ర
కొల్లాజెన్ ఉత్పత్తిపై ప్రభావంచూపుతుంది. ఇది చర్మంపై ఎఫెక్ట్ చూపి ముడతలకు
కారణమవుతుంది.

* సిగరెట్:

సిగరెట్ తాగడం ఆరోగ్యానికి హానికరం. అలాగే చర్మ సౌందర్యంపై కూడా ప్రభావం
పడుతుంది. అతిగా స్మోకింగ్ వల్ల చర్మం డల్ గా మారి ముడతలు వస్తాయి.
సిగరెట్లోని సమ్మేళనాలు కొల్లాజెన్ ఉత్పత్తిని తగ్గించడం ద్వారా చర్మంపై అకాల
ముడతలు ఏర్పడతాయి.

* కాలుష్యం:

గాలిలోని కాలుష్య కారణాలు ఆక్సీకరణ ఒత్తిడికి కారణమవుతాయి. దీనివల్ల చర్మంపై
ముడతలు వస్తాయి. ఈ కాలుష్యం వల్ల ఎలాస్టిన్, కొల్లెజన్ ఉత్పత్తి
దెబ్బతింటుంది. దీంతో ముడతలు వచ్చే అవకాశం ఉంది.

* పొడి చర్మం:

పొడి చర్మం ఉన్నవారు మరింత జాగ్రత్తగా ఉండటం అవసరం. చర్మం పగిలిపోయి దురద,
చికాకు కలిగిస్తుంది. చర్మంం పగిలి ముడతలు కూడా ఏర్పడతాయి. కాబట్టి పొడి చర్మం
ఉన్నవారు తరచూ మాయిశ్చరైజర్ ఉపయోగించడం మంచిది. అలాగే నీళ్లు ఎక్కువగా తాగాలి.

* ఆల్కహాల్:

ఆల్కహాల్ వల్ల బాడీ తొందరగా డీహైడ్రేట్ అవుతుంది. దీంతో చర్మం తేమ కోల్పోయి
పొడిబారిపోతుంది. దీనివల్ల చర్మంపై ముడతలు తొందరగా వస్తాయి.

* మెడిసిన్:

చిన్న వయసులోనే కొందరు అనారోగ్య సమస్యల కారణంగా తరచూ మెడిసిన్ వాడుతుంటారు.
ఇలాంటి వారిలోనూ చర్మం ముడతలు తొందరగా వస్తాయి. అలాగే డ్రగ్స్ తీసుకోవడం వల్ల
కూడా ముడతలు వస్తాయి.