ఇరాన్‌ అధ్యక్షుడితో ప్రధాని నరేంద్ర మోడీ భేటీ

జొహన్నెస్‌బర్గ్‌ : బ్రిక్స్‌ భేటీ సందర్భంగా ప్రధాని నరేంద్ర మోడీ ఇరాన్‌
అధ్యక్షుడు ఇబ్రహీం రైసీ సహా పలు దేశాల నేతలతో సమావేశమయ్యారు. రైసీతో చర్చల
సందర్భంగా ఇరువురు నేతలు వాణిజ్యం, పెట్టుబడులు, ఇంధనం, కనెక్టివిటీ,
ఉగ్రవాదం, అఫ్గానిస్తాన్‌ వంటి ద్వైపాక్షిక అంశాలతో చాబహర్‌ పోర్టు
అభివృద్ధిపైనా చర్చించారు. బ్రిక్స్‌లో ఇరాన్‌ చేరికకు మద్దతుగా నిలిచినందుకు
ప్రధాని మోడీ కి రైసీ కృతజ్ఞతలు తెలిపారు. చంద్రయాన్‌–3 విజయం సాధించినందుకు
మోదీకి అభినందనలు తెలియజేశారని విదేశాంగ శాఖ ప్రతినిధి అరిందమ్‌ బాగ్చి
వివరించారు. ప్రధాని మోదీ ఇథియోపియా అధ్యక్షుడు అబీ అహ్మద్‌ అలీ, సెనెగల్‌
అధ్యక్షుడు మాకీ సాల్, మొజాంబిక్‌ అధ్యక్షుడు ఫిలిప్‌ న్యూసీ తదితరులతో జరిగిన
భేటీలో పలు రంగాల్లో ద్వైపాక్షిక సహకారాన్ని మరింత పెంపొందించుకునేందుకు గల
అవకాశాలపై ప్రధాని మోదీ చర్చించారని బాగ్చీ వివరించారు. కాగా బ్రిక్స్‌
శిఖరాగ్రం అనంతరం ప్రధాని నరేంద్ర మోడీ జొహన్నెస్‌బర్గ్‌ నుంచి గ్రీస్‌కు
బయలుదేరారు.

ఆఫ్రికాకు భారత్‌ విశ్వసనీయ భాగస్వామి : ‘ఎజెండా 2063’సాధనలో ఆఫ్రికాకు భారత్‌
సన్నిహిత, విశ్వసనీయ భాగస్వామి అని ప్రధాని నరేంద్ర మోడీ అన్నారు. గ్లోబల్‌
సౌత్‌కు భారత్‌ కట్టుబడి ఉంటుందని ఆయన పునరుద్ఘాటించారు. ఉగ్రవాదం, ఆహారం,
ఇంధన భద్రత, వాతావరణ మార్పులు, సైబర్‌ సెక్యూరిటీ అంశాల్లో సహకారానికి ఎన్నో
అవకాశాలున్నాయని చెప్పారు. బ్రిక్స్, ఆఫ్రికా దేశాల ముఖ్య నేతలతో
జొహన్నెస్‌బర్గ్‌లో జరిగిన సమావేశంలో మోదీ ప్రసంగించారు. ఆఫ్రికా యూనియన్‌
శక్తివంతంగా రూపుదిద్దుకునేందుకు వచ్చే 50 ఏళ్లలో సాధించాల్సిన లక్ష్యాలపై
2013లో తయారు చేసిన ఆర్థికాభివృద్ధి నమూనాయే ‘అజెండా 2063’. ప్రపంచమే ఒక
కుటుంబమనే భావనను భారత్‌ వేల ఏళ్లుగా విశ్వసిస్తోందని ప్రధాని చెప్పారు.
ఆఫ్రికా దేశాలతో వాణిజ్యం, పెట్టుబడుల్లో భారత్‌ నాలుగు, అయిదో స్థానాల్లో
ఉందన్నారు.