ఉద్యమాన్ని ఎప్పుడూ నేతలు తాకట్టు పెట్టలేదు..
జీపీఎఫ్‌ నిధులను ప్రభుత్వం వాడుకోడమేంటి?
ఏపీ ఎన్జీవో సంఘం నేత బండి శ్రీనివాసరావు
విజయవాడ: రాష్ట్రంలో ఉద్యోగులకు జీతాలు చెల్లించాకే ఐఏఎస్‌లకు ఇస్తామని
నోటిమాటగా చెప్పడమే కానీ, అది అమల్లో లేదని ఏపీ ఎన్జీవో సంఘం నేత బండి
శ్రీనివాసరావు అన్నారు. ప్రభుత్వ రంగంలో పనిచేస్తున్న ఉద్యోగులందరికీ 62 ఏళ్ల
ఉద్యోగ విరమణ వయసు వర్తింపజేయాలని ఆయన డిమాండ్‌ చేశారు. రాష్ట్ర ప్రభుత్వ
ఉద్యోగుల పరిస్థితి కూలీ కన్నా దారుణంగా ఉందన్నారు. పాలు, కూరగాయలు, బ్యాంకుల
వాళ్ల దగ్గర కూడా ఉద్యోగులు లోకువయ్యే పరిస్థితిని ప్రభుత్వం కల్పించిందని
ఆవేదన వ్యక్తం చేశారు. ఉద్యోగులకు బ్యాంకులు రుణాలు కూడా ఇవ్వడం లేదన్నారు.
విజయవాడలో శుక్రవారం నిర్వహించిన మీడియా సమావేశంలో ఆయన మాట్లాడారు. ‘‘ఏ
ప్రభుత్వంతోనూ ఉద్యోగ సంఘాలకు లాలూచీ లేదు. ఉద్యోగుల ఉద్యమాన్ని ఎప్పుడూ నేతలు
తాకట్టు పెట్టలేదు. ఉద్యోగులు నెలంతా పనిచేస్తే 30న జీతం ఇవ్వడం ప్రభుత్వ
బాధ్యత. ఒక్క నెల జీతం రాకపోతేనే ఇబ్బందులు పడతాం.. అలాంటిది కాంట్రాక్టు,
అవుట్ సోర్సింగ్ ఉద్యోగులకు జీతాలు బకాయి పెడితే ఎలా? ఉద్యోగులకు జీతాలు
చెల్లించాకే ఐఏఎస్‌లకు ఇస్తామని నోటిమాటగా చెప్పడమే కానీ అది అమల్లో లేదు.
ప్రభుత్వ రంగంలో పనిచేస్తున్న ఉద్యోగులందరికీ 62 ఏళ్ల ఉద్యోగ విరమణ వయసు
వర్తింపజేయాలి. గ్రామ సచివాలయ ఉద్యోగులకూ బదిలీ ప్రక్రియ చేపట్టాలి. జీపీఎఫ్‌
నిధులను ఉద్యోగులకు ఇవ్వకుండా ప్రభుత్వం వాడుకోడమేంటి? సామాజిక పింఛన్లను ఒకటో
తేదీనే ఇస్తున్న ప్రభుత్వం పెన్షనర్లకు కూడా అదే ప్రాధాన్యత ఇవ్వాలని
శ్రీనివాసరావు డిమాండ్‌ చేశారు.
